Solarpunk
Traduttu di Salvatore Longhitano
Assai cristiani ànnu scrivutu supra ô Solarpunk nta l’ùrtima dicina di anni. Supratuttu doppu u 2014.
Cu tuttu chistu, u gèniri nun è ancora chiaramenti difinutu.
Stu Manifestu Solarpunkè un riadattamentu criativu dî pinzati ncapu ô solarpunk scritti di assai cristiani. Sti pinzati si ponnu attruvari principalimenti nte Solarpunk: a reference guide ca s’attrova cca e nte Solarpunk: Notes towards a Manifesto di Adam Flynn, ca s’attrova cca.
Nu Manifestu Solarpunk
U solarpunk è un muvimentu di narrativa fantàstica, arti, moda e attivìsimu ca cerca di arrispùnniri e ncarnari a dumanna “comu fussi na sucità sustinìbbili, e comu cci arrivamu?”
L’estètica dû solarpank junci u pràtticu cû beḍḍu, u bonu pruggittatu cû virdi e rigugghiusu, u lustrusu e culuratu cû sìmplici e sòlitu.
U solarpunk po èssiri utòpicu, simplicimenti uttimìsticu o pruccupatu pî lotti pi criari un munnu megghiu, ma mai distòpicu.
Mentri ca u nostru munnu è sempri cchiù ‘n putiri dî calamità, zoccu ni giuva su’ suluzziona, nun sulu abbirtimenti. Suluzziona pi pruspirari senza cummustìbbili fòssili, pi manijari equamenti a scarsizza riali e spàrtiri nta l’abbunnanza mmeci di suppurtari a scarsizza fausa e l’abbunnanza fausa, pi èssiri cchiù gintili ntra di nuiautri e cû chianita ca spartemu.
U solarpunk è ô stissu tempu na visiuni dû futuru, na pruvucazzioni pinzanti, na manera di campari e nu nzemi di pruposti rialìstichi pi ragghiùnciri ḍḍu futuru.
-
Semu solarpunk picchì l’uttimìsimu ni fu livatu e stamu pruvannu a ricupirallu.
-
Semu solarpunk picchì l’ùnici autri aḍḍijuti su’ a nigazzioni o a dispirazzioni.
-
 basi, u solarpunk è na visiuni di un futuru ca ncarna u megghiu ca l’umanità po ragghiùnciri: un munnu post-scarsizza, post-girarchìa, post-capitalìsticu unni l’umanità si vidi comu parti dâ natura e l’enirgìa pulita sustituisci i cummustìbbili fòssili.
-
U «punk» nte solarpunk riguarda a ribbilliuni, a contracurtura, u post-capitalìsimu, a diculunizzazzioni e u ntusiàsimu. Àvi a chi fari cû jiri nta na dirizzioni diversa rispettu ô mainstream, ca sta jennu sempri cchiù assai nta na dirizzioni scantusa.
-
U solarpunk è tantu un muvimentu quantu è un gèniri: nun si tratta sulu di stori, ma macari di comu putemu rializzalli.
-
U solarpunk cumprenni na sfunnacata di tàttichi: nun cc’è sulu na manera giusta di fari solarpunk. Mmeci, diversi cumunità di tuttu u munnu nni adòttanu u nomu e i pinzati e custruìscinu nicchi di rivuluzzioni autusufficenti.
-
U solarpunk furnisci na pruspittiva nova e prizziusa, un paradimma e un vucabbulariu pi discrìviri un futuru pussìbbili. Mmeci di abbrazzari u retrufuturìsimu, u solarpunk talìa cumpletamenti ô futuru. No un futuru autirnativu, ma un futuru pussìbbili.
-
U nostru futurìsimu nun è nichilista comu a chiḍḍu dû cyberpunk e scanza i tinnenzi putenziarmenti quasi riazziunari dû steampunk: riguarda u ncignu, a giniratività, a nnipinnenza e a cumunità.
-
U solarpunk suttalinia a sustinibbilità ammintali e a giustizzia suciali.
-
U solarpunk àvi a chi fari câ risciduta di maneri pi rènniri a vita maravigghiusa nta stu mumentu e macari pî ginirazziona ca ni sicutarannu.
-
U nostru futuru hâ cumprènniri u riusu e a trasfurmazzioni di zoccu avemu già. Mmàggina sbarazzàrisi dî “cità ntilliggenti” a favuri dâ citatinanza ntilliggenti.
-
U solarpunk arricanusci a nfruenza stòrica ca a pulìtica e a fantascenza ànnu avutu una supra a l’autra.
-
U solarpunk arricanusci a fantascenza nun sulu comu sìmplici ntrattinimentu, ma puru comu na furma di attivìsimu.
-
U solarpunk voli cuntrastari i scinari di na terra murenti, di na diffirenza nzuvirchiàbbili ntra ricchi e pòviri e di na sucità cuntrullata di curpurazziona. No ntra cintinara di anni, ma ora.
-
U solarpunk riguarda a curtura maker dî jùvini, i suluzziona lucali, i riti enirgètichi lucali, i maneri di criari sistemi di funziunamentu autònumi. Riguarda l’amuri pû munnu.
-
A curtura solarpunk cumprenni tutti i curturi, riliggiuni, abbilità, i sessi, i gèniri e l’identità sissuali.
-
U solarpunk è l’idea di l’umanità ca ragghiunci n’evuluzzioni suciali ca abbrazza nun sulu a sìmplici tulliranza, ma na cchiù cumpleta cumpassiuni e accittazzioni.
-
L’estètica visiva dû solarpunk è raputa e ‘n evuluzzioni. Nta stu mumentu è n’ammiscata di:
1. Era dâ navigazzioni a vela e dû mitu dâ fruntera ottucintiscu (ma cu cchiù assai bicicletti)
2. U riusu criativu dî nfrastrutturi esistenti (ê voti post-apucalìtticu, ê voti cuntimpuraniu-streusu)
3. Tecnuluggìa appriupiata
4. Stili Liberty
5. Hayao Miyazaki
6. Nnuvazzioni ‘n stili «jugaad» dî pajisi nun-punintini
7. Back-end high-tech cu risurtati sìmplici e puliti
-
L’ammienti custrujuti dû solarpunk su’ ispirati ê principi dû Neurbanìsimu ô dû Neupidunalìsimu e dâ sustinibbilità ammintali.
-
U solarpunk cuncipisci n’ammienti custrujutu adattatu criativamenti pi, ntra l’autri cosi, sfruttari u guadagnu sulari usannu diffirenti tecnuluggìi. L’ubbittivu è prumòviri l’autusufficenza e campari intra finaiti naturali.
-
Ntô solarpunk ni firmammu giustu ‘n tempu pi frinari a lenta distruzzioni dû nostru chianita. Ni nzignammu a usari a scenza cu saggizza, pi ammigghiurari i nostri cunnizziona comu parti dû nostru chianita. Nun semu cchiù capi supremi. Semu assistenti. Semu jardinari.
-
U solarpunk:
1. è variu
2. àvi spazziu pâ cuisistenza di spiritualità e scenza
3. è beḍḍu
4. po succèdiri. Ora
La Comunità Solarpunk
Quest’opera è distribuita con Licenza Creative Commons Attribuzione – Condividi allo stesso modo 4.0 Internazionale.